Uzinduzi wa chanjo ya Polio Nyamagana

Posted on: May 18th, 2022

UZINDUZI WA CHANJO YA POLIO HALMASHAURI YA JIJI LA MWANZA

MKUU wa Wilaya ya Nyamagana Mhe, Amina Makilagi ameongoza uzinduzi wa Kampeni ya Chanjo ya polio  na amewasihi wazazi walio na watoto wa chini ya Umri wa miaka mitano (0-5) kuhakikisha wanawapeleka watoto wao kupata chanjo ya matone ya Polio ili kuwaepusha na ugonjwa huo hatari ambao tayari umeishaingia nchi jirani ya Malawi.

Mhe, Makilagi ametoa kauli hiyo leo wakati akizindua  Chanjo ya Matone ya Polio kwa watoto walio chini ya Miaka (0-5) Katika Zahanati ya Mkolani Jijini hapa ambapo pia  ameshiriki zoezi la kuwachanja baadhi ya watoto.

“Kumekuwepo na kasumba ya watu wasiowatakiwa mema kwa kuwatisha kuwa chanjo hizi ni hatari kwa watoto jambo ambalo si kweli bali chanjo hizi ni muhimu kwani mtoto asiyepata chanjo ni hatari kwa maisha yake na Jamii inayomzunguka na anaweza kuambukizwa magonjwa na kuambukiza wengine pia,” Amesema Makilagi.

Aidha Mhe, Amina ameeleza kuwa kwa sasa wilaya ya Nyamagana imejiandaa kuchanja watoto zaidi ya 92,000, huku chanjo hii  ikitolewa majumbani, masokoni,standi,nyumba za Ibada na vituo vya mabasi na sehemu yenye mikusanyiko.