MKUU WA WILAYA NA WADAU WA MAZINGIRA KUING'ARISHA MYAMAGANA

Posted on: September 29th, 2022

Mkuu wa Wilaya ya Nyamagana Mhe. Amina Nassoro Makilagi  amefanya kikao na wadau  wa Mazingira  katika ukumbi wa Sokoine Butimba wilayani Nyamagana Jijini Mwanza, leo tarehe 29/9/2022.

Katika kikao hicho chenye kauli mbiu " Tunza Mazingira ,ng'arisha Nyamagana"  Mhe. Makilagi ameeleza umuhimu wa kuyatunza mazingira na kuyaweka katika hali ya usafi  na kwamba ukitunza mazingira , yatakutunza.   "Nimewaiteni ninyi wadau wa mazingira ili kwa pamoja tuifanye Mwanza kuwa ya kijani na yenye kuvutia kwa kupanda miti na maua  sehemu za milimani, kando kando  ya barabara, kando ya ziwa,   kwenye  makazi ya watu  na sehemu za bustani zilizo kufa tuzifufuwe na kubuni maeneo mengine ambayo pia yatapendezesha mji wetu." Amesema Mhe. Amina Makilagi.

Akifafanua zaidi Mkuu wa wilaya ya Nyamagana  amesema kamati maalumu  ya mazingira imeundwa ili kuhakikisha  elimu inatolewa zaidi kwa wananchi kuhusu mazingira na hasa kuhamasisha zaidi juu ya kampeini ya  upandaji miti  ikiwemo miti ya matunda na kuitunza.

Aidha amesema " Ili zoezi hili likamilike na kufanikiwa zinahitajika jumla Tsh. Milioni 120 ambazo zitapatikana toka kwa wadau mbalimbali wa mazingira. kila mtaa utapewa miti 600 ya miparachichi na kila mwenyekiti ahakikishe inapandea na kutunzwa katika eneo lake.

Sambamba na hayo Mhe. Makilagi amewataka wenyeviti wa mitaa, watendaji, maafisa maendeleo ya jamii, maafisa ustawi wa jamii na wadau wote wa mazingira kuwa vinara wa kampeini hii kwa kusisitiza usafi, upandaji miti, na utunzaji miti na maua kila mtu katika eneo lake.

Akikazia jambo hilo, amewataka mawakala wote wa usafi kuwa makini na suala la usafi hasa maeneo ya masoko na katika kaya za wananchi bila kuacha uchafu   kwenye kaya za watu.  

Naye  Bwana  Hamisi wakala wa huduma xa misitu Nyamagana, ambaye ni mdau mkubwa wa misitu ameeleza umuhimu wa kutunza miti  na ameahidi kutoa ushirikiano mkubwa kwa kuchangia kutoa miti hasa ya kupanda maeneo ya barabarani aina ya miashoki.

Mhe. Amina Makilagi amesisitiza suala la ushirikiano kaitika kufanikisha suala la usafi na utunzaji mazingira  na kuifanya Mwanza kuwa ya kuvutia  si kwa wanamwanza tu, bali kwa Watanzania na wageni kwa ujumla.