Mkurugenzi wa Jiji la Mwanza atoa somo kwa watumishi wa Halmashauri

Posted on: March 21st, 2018

Mkuruguenzi wa Halmashauri ya Jiji la Mwanza ndugu Kiomoni Kiburwa Kibamba atoa somo la maadili kwa watumishi wa Umma. Somo hilo amelitoa alipofanya Kikao na watumishi wa Halmashauri ya Jiji la Mwanza jengo la utawala jana.

“ Kumeanza kuibuka tabia kwa baadhi ya watumishi wa umma kutokuvaa mavazi ya haiba na kusababisha heshima ya Halmashauri yetu kushuka” alisema Kibamba.

Mkurugenzi kutokana na baadhi ya watumishi wa Umma kuendelea kutokuvaa mavazi rasmi yanayotajwa na waraka wa Mavazi kwa watumishi wa Umma wa Mwaka 2007. Hivyo ameona ni vyema kukumbushana  ili watumishi waishi kwa kuzingatia maadili na Misingi ya utumishi wa Umma.

Aidha Mkurugenzi ameendelea kusisitiza watumishi kufanya kazi kwa bidii na kuwa na nidhamu wakati wanapotekeleza majukumu yao ya kila siku “Ni vyema kuwa na lugha yenye staha mnapowahudumia wananchi na watumishi wenzenu kwa sababu ndio msingi wa ninyi kuwa mahala hapa”  alisema ndugu Kibamba

Mkurugenzi ameendelea kusisitiza kuwa hatakuwa tayari kuwavumilia wazembe  wasiotekeleza wajibu wao inavyotakiwa kwa sababu akiendekeza wazembe utekelezaji wa Ilani hautafanikiwa ilivyopangwa.

Kikao hiki alichokifanya na watumishi ni mfululizo wa vikao anavyovifanya Mkurugenzi wa Halmashauri mara kwa mara kwa ajili ya kukumbushana na kujadiliana kuhusiana na masuala mtambuka ya Halmashauri.