Waziri wa ardhi aongeza muda wa ukusanyaji kodi ya ardhi kwa Halmashauri zote nchini hadi Aprili 2018

Posted on: January 26th, 2018

Mh Wiliam Lukuvi ameyasema hayo leo alipozuru Halmashauri ya Jiji la Mwanza na kukutana na watumishi wa Idara ya Mipangomiji kwa kuziagiza Halmashauri zote nchini kulifanya zoezi la ukusanyaji kodi ya ardhi kuwa la lazima na sio ziada ili kuongeza mapato ya serikali  “serikali sasa inatoa elimu bure nchini kote  kwa kuleta ruzuku mashuleni fedha hizo ndizo hizi mnazozikusanya” amesema Lukuvi

Katika kikao chake hicho na watumishi katika   Ukumbi Mkubwa wa Halmashauri, Mheshimiwa waziri  ameipongeza   Halmashauri ya Jiji la Mwanza  kwa kazi kubwa walioifanya  kwa kupima zaidi ya viwanja  19000 na kupunguza kero za wananchi zinazohusiana na ardhi tofauti ilivyokuwa huko nyuma.

Aidha Mheshimiwa Lukuvi amezitaka Taasisi zote za serikali kwa mwaka huu  kupima maeneo yao na kuyawekea alama zinazoeleweka ili kuzuia migogoro mbalimbali inayojitokeza kati ya wananchi na taasisi husika kwa watu kuvamia maeneo mbali mbali yaliyotengwa na Taasisi hizo.

Hali kadhalika Mheshimiwa Waziri amewataka Maafisa wote wa ardhi kuhakikisha wanapotoa  hati  za ardhi majina ya wamiliki yanafanana na majina yaliyosajiliwa  kwenye vitambulisho vya Taifa kuepuka watu kukwepa kodi za serikali.

Mwisho Mheshimiwa waziri amesema wapo katika hatua ya mwisho ya kuandaa utaratibu wa kuwatambua watu wenye viwanja au mashamba ambayo yapo mjini na hayajapimwa kulipa kodi ya viwanja vyao.

Akihitimisha katika kikao hicho Mheshimiwa Mkuu wa wilaya ya Nyamagana Bi Mary Tesha Onesmo amemuhahidi Mheshimiwa waziri kuhakikisha maagizo yote aliyoyatoa yanatekelezwa