WAJUMBE WA ALAT MKOA WA MARA WAFANYA ZIARA YA MAFUNZO KATIKA HALMASHAURI YA JIJI LA MWANZA

Posted on: February 11th, 2025

Mwenyekiti wa Jumuiya ya Tawala za Mitaa (ALAT) kutoka Mkoa wa Mara Mhe. Daniel  Komote amewaongoza wajumbe wa Jumuiya hiyo katika ziara ya kujifunza ndani ya Halmashauri ya Jiji la Mwanza, mnamo Februari 11, 2025.

Katika ziara hiyo, wajumbe wamejifunza mbinu mbalimbali za ufanisi katika usimamizi wa miradi ya maendeleo na ukusanyaji wa mapato huku lengo kuu likiwa ni kubadilishana uzoefu na kujenga uwezo wa kuboresha utendaji katika Halmashauri zao.

Katika mafunzo hayo wajumbe wamepata nafasi ya kujifunza juu ya mfumo wa ukusanyaji mapato (Balozi System) ambao unatumiwa na Halmashauri ya Jiji la Mwanza kwa kutumia Mabalozi kuwatambua wafanyabiashara katika mitaa yao.

Aidha Mhe. Emmanuel Machumwa kwa niaba ya wajumbe ameipongeza Halmashauri ya Jiji la Mwanza na kuahidi kufanyia kazi mbinu hiyo kupitia vikao vyao vya kikanuni na kuona namna ya kuwatumia mabalozi katika kukusanya mapato.

Katika hatua nyingine wajumbe wamepata nafasi ya kutembelea miradi inayotekelezwa na Halmashauri ikiwemo mradi wa ufugaji wa samaki kwa njia ya Vizimba (Luchelele), mradi wa Ufyatuaji tofali pamoja na eneo la kutunzia taka ngumu( Dampo) Buhongwa.

Ziara kama hizi ni muhimu kwa viongozi wa serikali za mitaa ili kuimarisha utendaji wao na kuhakikisha huduma bora kwa wananchi.