Naibu waziri afurahishwa na Miradi mikubwa inayotekelezwa na Halmashauri ya Jiji la Mwanza

Posted on: March 20th, 2018

Naibu waziri afurahishwa na Miradi mikubwa inayotekelezwa na Halmashauri ya Jiji la Mwanza

Naibu waziri Ofisi ya Rais –TAMISEMI,Mheshimiwa Joseph George Kakunda amefanya ziara ya kikazi katika Halmashauri ya Jiji la Mwanza na kutembelea miradi  Mikubwa inayotekelezwa na Halmashauri ya Jiji la Mwanza na wadau wengine wa maendeleo yenye thamani zaidi ya Shilingi Bilioni 5 za Kitanzania.

Miradi ya Maendeleo iliyotembelewa ni pamoja na Ujenzi wa Machinjio ya Kisasa yenye thamani ya zaidi ya milioni Miatisa,Ujenzi wa Dampo la Kisasa ambao utagharimu zaidi ya Bilioni Nne.

Akiwa Katika Machinjio ya Kisasa Mheshimiwa Kakunda,amewapongeza wadau wa maendeleo LVEMP pamoja na Halmashauri ya Jiji la Mwanza kwa kutekeleza mradi mkubwa  wenye kuzingatia athari za mazingira na utakaotoa fursa kubwa za kiuchumi kwa wakazi wa Mwanza

“Niwashukuru kwa kuwekeza kwenye mradi huu mkubwa  wa kisasa ambao utaongeza tija katika uchinjaji wa mifugo na uhifadhi wa mazao ya mifugo’’ alisema Mheshimiwa Kakunda.Sanjari na Machinjio  Mheshimiwa Kakunda akiwa katika Dampo la Kisasa Buhongwa, alishuhudia namna wananchi walivyovamia eneo hilo. Hivyo kutokana na uvamizi huo Mheshiiwa Kakunda amewataka wananchi wote walioko kwenye “Buffer zone” kuondoka mara moja maeneo hayo kwa ajili ya ustawi wa afya zao

Pamoja na ziara Mheshimiwa Kakunda alifanya Mkutano na watumishi wa Halmashauri na kuitaka Halmashaurii ya Jiji la Mwanza kuweka mfumo mzuri wa kuhifadhi milima ili kuzuia  uvamiaji wa maeneo ya milima ili kuzuia athari za mazingira

Pamoja na hilo, Mheshimiwa  Kakunda  ameiagiza Halmashauri kuteuwa shule kwa ajili ya watoto wenye mahitaji maalum ili kuwafanya walemavu kupata Elimu

Aidha Mheshimiwa Kakunda amesisitiza watumishi kufanya kazi kwa kuzingatia miiko na maadili ya watumishi wa umma hususani kuvaa mavazi yenye haiba.