Pikipiki 18 zakabidhiwa kwa maafisa elimu kata wa halmashauri ya Jiji la Mwanza

Posted on: September 10th, 2018

Mkuu wa Mkoa  wa Mwanza  Mhe.John mongella  amekabidhi pikipiki 18 zenye thamani ya takribani Tsh 54,000,000 kwa maafisa  Elimu  wa  kata waliomo  Katika Halmashauri  ya Jiji la Mwanza 

Akizungumza kwenye hafla hiyo Mkuu wa Mkoa wa Mwanza Mhe.John Mongella amewataka Maafisa kuzitumia na kuzitunza vyema kwa lengo lilokusudiwa kwa ajili ya kuleta tija na ufanisi katika sekta ya Elimu.

Aidha Mhe.Mongella amesisitiza kuwa serikali ya awamu ya Tano imejikita kuimarisha sekta ya Elimu, hivyo kila Mwalimu ana wajibu wa msingi wa kuiwezesha sekta hii izidi kusonga mbele kwa kila mwalimu kutimiza wajibu wake “Halmashauri zote 8 za Mkoa wa Mwanza zimepata Pikipiki hizi kwa ajili ya maafisa Elimu Kata hivyo ni imani yangu kuwa vyombo hivi vya usafiri vitaongeza tija na ufanisi katika utendaji wenu wa kazi” alisema Mhe.Mongella.

Akitoa salaam zake Mstahiki meya wa Jiji la Mwanza Mhe.James Bwire  amesema wadau wote Jijini Mwanza wanawajibu wa kumuunga mkono Mhe.Dkt John pombe Magufuli kwa kazi kubwa na nzuri anayoifanya ya kuwaletea wananchi maendeleo “Hizi Pikipiki ni sehemu ndogo tu ya kazi inayofanywa na Mhe.Rais,Hivyo ni vyema maafisa elimu kuzitumia pikipiki kwa kazi zilizokusudiwa na si vinginevyo” alisema Mhe Bwire.

Akizungumza katika hafla hiyo,Kaimu mkurugenzi wa Jiji la Mwanza Philipo Kajura Mukama  amesema ili kuimarisha  usimamizi wa Elimu katika shule zetu  Serikali imetoa Pikipiki hizi kwa ajili ya maafisa Elimu  wa Kata. Hivyo amewataka maafisa elimu kuzingatia taratibu walizopewa kwa kila mtumiaji wa Pikipiki hizo kuhakikisha anakuwa na leseni inayomruhusu kutumia chombo cha moto.

Hata hivyo Ndugu Mukama amewatahadharisha maafisa elimu kutotumia pikipiki hizo kwa ajili ya kubebea mizigo na Abiria.

Pikipiki hizo zimetolewa na OR-TAMISEMI kwa kushirikiana na wadau mbalimbali  wa elimu  kupitia programu ya EQUIT na LANES zenye thamani ya Tsh milioni 54