WALIMU WAZALENDO WAJENGA MABWENI

Posted on: January 7th, 2025

Ikiwa ni muendelezo wa ziara ya Mkurugenzi wa Halmashauri ya Jiji la Mwanza na Watalaam kutoka Kada mbalimbali iliyoanza Januari 06,2025 kwaajili ya kukagua Miradi ya Maendeleo ambapo ameshuhudia na kutoa  pongezi kwa Uongozi wa Shule ya Sekondari Capri-point iliyopo  kata ya Butimba kwa ujenzi wa mabweni mawili ya Wasichana.

Pongezi hizo zimetolewa leo Januari 07,2025 na Wakili. Kiomoni Kibamba Mkurugenzi wa Jiji la Mwanza huku akikiri kuwa Walimu hao wamefanya jambo kubwa na la kizalendo kwa maendeleo ya wilaya ya Nyamagana na Taifa kwa Ujumla.

Vilevile Uongozi wa Shule hiyo kwa kutambua umuhimu wa miundombinu wezeshi hasa kwa watoto wa kike, Walimu wa Shule ya Sekondari Capri-point waliamua kuchanga kiasi Cha Sh.36,000,000 kutoka kwenye mishahara yao na kufanikiwa kujenga na kuboresha miundombinu mbalimbali ikiwemo bweni litakalo tumiwa na Wasichana, choo, bwalo la chakula na jiko.

Naye Mwl.Benedicto Thomas ambaye ni mkuu wa Shule hiyo ameueleza Uongozi wa Halmashauri ya Jiji la Mwanza kuwa "Mabweni 2 yaliyojengwa yanauwezo wa kubeba idadi ya Wanafunzi 80 ambapo  kila bweni 1 litabeba Wanafunzi 40 huku kila chumba kikiwa na vitanda 20"suala litakalo pelekea kuongeza ufaulu katika shule hiyo.

Aidha Mkurugenzi wa Halmashauri ya Jiji la Mwanza ameahidi kutoa kiasi Cha Sh.20,000,000 kwa ajiili ya ukamilishaji wa  bwalo la chakula  ambalo lilisimama  kutokana na upungufu wa fedha. 

Mbali na kukagua mradi huo wa bweni Mkurugenzi wa Halmashauri ya Jiji la Mwanza amekagua miradi mingine ya mpango mkakati ikiwemo miradi ya Afya, Shule na Miundombinu ya Barabara huku akisisitiza wasimamizi  kuendana na kasi ya ujenzi ili miradi ikamilike kwa wakati.