HALMASHAURI YA JIJI LA MWANZA YAKAGUA MIRADI MBALIMBALI YA MAENDELEO

Posted on: January 6th, 2025

Mkurugenzi wa Jiji la Mwanza Wakili, Kiomoni K. Kibamba  Leo January 6,2025  amefanya ziara na wataalamu  kutoka  idara mbalimbali kukagua miradi ya maendeleo katika maeneo tofauti tofauti ndani wilaya ya Nyamagana.

Katika ziara hiyo Mkurugunzi  Kibamba amekagua Shamba lililopo kata ya luchelele,mtaa wa Kisoko lenye  ukubwa wa zaidi ya hekari Tano ambalo limetengwa kwaajili ya ujenzi wa shule ya sekondari.

Aidha Mkurugunzi Kibamba ameagiza ujenzi huo kukamilishwa ndani ya siku 90 kwani tayari milioni 584 zimekwisha tolewa kwa ajili ya ujenzi huku akisisitiza wananchi wote ambao Bado hawajalipwa fidia walipwe Ili kupisha ujenzi huo uanze mara moja.

Hata hivyo Diwani wa kata ya Luchelele Mhe,Vincent Lusana Tegge amemuhakikishia Mkurugunzi kuwa Wananchi wa eneo lake ni wasikivu na pindi tu watakapo lipwa fidia zao watapisha ujenzi huo haraka iwezekanavyo.

Naye Mwl, Amani Alon ambaye ni msimamizi wa mradi wa  Shule ya Msingi  Shadi amemueleza Mkurugunzi na Wataalamu kuwa  ujenzi wa Shule hiyo wenye  jumla ya madarasa 9, 7kwaajili ya elimu ya Msingi na madarasa 2 ya awali, matundu ya vyoo 16 pamoja na jengo la utawala vilivyogharimu takribani milioni 351,500,000 vimefikia katika hatua ya umaliziaji.

Vilevile Mkurugunzi na wataalamu wamefanikiwa kukagua Ujenzi wa madarasa mapya yaliyopo katika shule zilizopo kata ya Mkolani  ikiwemo Shule ya Sekondari Nyabulogoya, Shule ya Msingi Nyahingi ambapo amekagua vyumba 7 pamoja na Shule ya Msingi Kasese  yenye vyumba vya Madarasa vipya 9 na madawati 405.

Mkurugenzi Kibamba amehitimisha ziara hiyo kwa kuwataka wasimamizi wa miradi hiyo kufanya kazi usiku na mchana na kusaidia kukamilika  kwa wakati uliopangwa Ili kupunguza msongamano wa Wanafunzi madarasa.