DC NYAMAGANA AADHIMISHA KUZALIWA KWA RAIS SAMIA KWA KUPANDA MITI

Posted on: January 27th, 2025

Mkuu wa Wilaya ya Nyamagana Mhe, Amina Makilagi ameadhimisha siku ya kuzaliwa kwa Rais wa Jamhuri ya Muungano wa Tanzania Dkt, Samia Suluhu Hassan kwa kupanda miti katika taasisi mbalimbali zikiwemo Shule za Msingi na Sekondari.

Ikiwa ni adhimisho la miaka 65 ya kuzaliwa kwa Dkt, Samia, leo Januari 27, 2025 Mhe. Makilagi ameshirikiana na wananchi kupanda miti Shule ya Msingi Mahina kata ya Igoma kama ishara nzuri ya kusherehekea na pia kuunga mkono juhudi za Mhe, Rais za kuifanya Tanzania kuwa ya Kijani na kudumisha urithi wa kijani.

Katika hatua nyingine Mhe. Makilagi ametumia siku hii kukata keki kwa niaba ya Dkt Samia katika Shule za Msingi Nyamagana A na B na kupata fursa ya kula pamoja na viongozi mbalimbali wa Serikali na Chama, walimu pamoja na wanafunzi.

Vile vile Makilagi ametoa wito kwa wazazi ambao bado hawajawaandikisha watoto wenye umri wa kwenda Shule wahakikishe wanawapeleka  kwani ni haki yao ya msingi ya kupata elimu. “ Nilitoa wiki mbili kwa wazazi na walezi kuhakikisha wanapeleka watoto shule na zinakaribia kuisha, hivyo hakikisheni mnapeleka watoto shule kabla sheria haijachukua mkondo wake.”

DC ametamatisha kwa kuwaomba wananchi kuendelea kufanya kazi za kuwaletea maendeleo na Taifa kwa jumla  na kudumisha amani, utulivu na Upendo.